XXV. Poncii de Jardino, Episcopi Maioricensis constitutio

XXV.

Domini Poncii de Jardino, Episcopi Maioricensis constitutio qua cavetur ne clerici pueros levent de sacro fonte, qui sibi intra tertiam consanguinitatis lineam coniuncti non sint, an. MCCXCVIII. (Vid. pág. 154.)

Ex lib. Constitut. eccl. Maioric.

Quoniam inimicus noster non dormit, sed multis multiplices parare festinat insidias, et frequenter ut durius feriat in lucis Angelum se transformat, curandum est provide sic huius vitae cursum peragere, quod cum venerit non inveniat nos inhermes, sed virtutis incrementis *accineti (no se ve bien), deiecta huius hostis vesania, mereamur feliciter Sanctorum sedibus collocari. Quo circa nos Poncius Dei gratia Episcopus Maioric. de fratrum nostrorum consilio presenti decreto salubriter statuimus, ut nullus de canonicis nostris seu aliis quibuscumque clericis in nostra civitate vel diocesi constitutis, filios aliquorum sibi non coniunctorum citra tertiam lineam parentelae audeat de sacro baptismo suscipere, nec sibi ex sacramento huiusmodi compatres facere nec comatres, nisi cum ratione sui oficii voluerit aliquos baptizare. Qui vobis contrarium fuerint, nisi iminente forsitan hiis qui baptizandi fuerint, mortis periculo, et alii inveniri non possint, qui eos de dicto sacro baptismo suscipiant, tamquam nostrae constitutionis violator malivolus, correctione debita ad arbitrium iudicis castigetur. Quod est actum III. non. octob., anno Domini M.CC.LXXXX octavo. = Nos Poncius Dei gratia Episcopus Maioric. subscribimus. = Ego Bereng. de Cunillis, Archidiac. Maioric. subscribo. = Ego Bartolomeus Valentini, Thesaurarius Maioric. subscribo. = Ego Arnaldus de Turri, canonicus et Praepositus Maioric. subscribo. = Ego Petrus de Turricella, canonicus Maioric. subscribo. = Signum Jacobi de Marina, notarii publici. Maioric. qui hoc scribi fecit et clausit.

XX. Constitutio super custodia panni Domini nostri Jesu Christi in ecclesia Illerdensi edita anno M.CCC.XXIV. (1324)

XX. 

Constitutio super custodia panni Domini nostri Jesu Christi in ecclesia Illerdensi edita anno M.CCC.XXIV. (1324) (Vid. pág. 72.)

Ex libr. Constitut. eccl. Illerden. fol. 44. 

Innefabilis Salvatoris Domini Dei nostri Jhesu Christi clementia intimae caritatis affectu inter multiplices gratias quibus Ilerdensem ecclesiam honorifice decoravit, praetioso panno quo ipse Christus filius Dei vivi fuit totus involutus in terris, eundem pannum recondendo in dicta ecclesia Ilerdensi, eam insignivit pariter et ditavit ut ipsi filio Dei gloriosi suis servitoribus amabilis, suo populo devota et cunctis fidelibus honorabilis memorata Ilerdensis ecclesia redderetur. Verum cum propter importunas seu inpressivas preces aliquorum magnorum dominorum quibus aliqua frusta abscisa de dicto panno fuerunt data, dictus pannus fuerit minoratus seu etiam decurtatus, et praesumatur amplius minorari in dictae ecclesiae et populi scandalum seu etiam detrimentum, nisi oportuno remedio succurratur, ideo hac pia et sancta constitutione sanctimus et in perpetuum volumus ac irrevocabiliter ordinamus quod non liceat nobis Episcopo nec Capitulo nec cuivis de Capitulo vel extra comuniter vel divisim, publice vel occulte, vel quocumque alio colore quaesito accipere, dividere, scindere, dare, concedere, seu scindi vel decurtari permittere aliquid de dicto precioso panno Domini nostri Jhesu Christi pro nobis ipsis comuniter vel divisim seu pro aliqua persona, etiam si pontificali, imperiali vel regali prefulgeat dignitate seu cuiuscumque praeheminentiae, conditionis seu status existat, sola Sede Apostolica excepta, cui tenemur in omnibus obedire, sed ipsum pannum preciosum servare de coetero et custodire illibatum omni machinatione, fraude seu dolo cessantibus. Et ut praesens statutum seu constitutio firmiter observetur nos Poncius Dei gratia Episcopus, Gilabertus de Crudiliis Sacrista, Petrus Molinerii, Archidiaconus Ripacurciae, G. de Solerio, Ja. de Rege, Bernardus de Plicamanibus, Peregrinus de Fontova, G. Aranyonis, Ferrarius de Curtibus, doctor decretorum, et R. G. de Fabrica, canonici Ilerdenses per nos et successores nostros promittimus et juramus ad Sancta Dei Evangelia coram nobis dicto Episcopo posita et a nobis de Capitulo propriis manibus tacta dictam constitutionem seu statutum inviolabiliter observare, et quantum in nobis fuerit ab aliis facere observari, et non contravenire palam vel occulte. Sic Deus nos adiuvet et praedicta Sancta Dei Evangelia.

VI. Constitutio de vestibus clericorum.

VI.

Constitutio de vestibus clericorum. (Vid pág. 26).

Ex Manual. curiae episc. Gerund. núm. 1. ab ann. 1401 ad 1403, fol. 5. b.

Berengarius miseratione divina tituli Sancti Clementis presbiter Cardinalis administrator auctoritate Apostolica in spiritualibus et temporalibus ecclesiae Gerundensis universis et singulis viris ecclesiasticis beneficiatis et etiam in sacris ordinibus constitutis per dictam Cathedralem et alias ecclesias ac monasteria civitatis et nostrae diocesis Gerundensis ubilibet constitutis cuiuscumque dignitatis status, gradus, ordinis vel condicionis existant et quocumque nomine censeantur presentibus et futuris nobis lege diocesana subjectis salutem in Domino Jhesu Christo. Spectat ad officium praesidentis subditos eos presertim qui divina tenentur misteria et officia celebrare taliter regulare ut sint lucerna super candelabrum, ac vita illorum pre ceteris rutilet honestate. Et quibus observantia dispar existit dissimilis habitus videatur, ne cum Evangelium predicabunt apud eos qui subsunt scandalum suscitetur, sed omnes in unum propositum et honestum habitum quantum ad eorum spectat officium se conforment. Sane sicut intelleximus et non sine admiracione conspicimus evidenter, multi e vobis vestibus saltem supertunicalibus abutuntur: quidam siquidem nimis longas, alii nimis latas in earum manicis atque collaribus valde altis, nonnulli pellibus nimium eminentibus undecumque et modis aliis inhonestas pariter et deformes sibi induere et patenter portare indutas inter maiores ac mediocres et minores vix differentiam faciendo aliquatenus non verentur; cupientes igitur ex nostri injuncto officii quo tenemur huic morbo pestifero quantum nobis ab alto conceditur, obviare, et clericorum mores et actus in melius divina dante gratia reformentur ac cuncti quibus dirigimus presens scriptum sancte vivere studeant et honeste, super predictis auctoritate ordinaria et tenore presenti providemus et ordinamus expressius inhibendo ex certa scientia et consulte districte etiam injungentes in virtute sanctae obedientiae omnibus et singulis viris ecclesiasticis supra dictis, ne quis vestes nimis longas vel nimis breves aut alias habentes manicas (N. E. mangas; algunas mañicas las llevan; puñetas, puñetes, punyetes, como las de algunos de Queretes, Cretas) vel collaria quae nimia brevitate, longitudine vel latitudine aut supereminentibus forraturis seu aliqua alia defformitate merito valeant annotari seu in proximi occulis offendiculum vel scandalum generare, sed honestati clericali conformes habentes manicas non ultra quam tribus ad plus palmis cannae pannorum Gerundae in suo dilatatas circulari ambitu et hiatu cubitalibus proporcionatis ipsis manicis non oblongis ac etiam collaria brevia saltem duobus digitis sub maxilla seu quodque medium colli plus quam per unicum digitum non excedant, neque pelles superemineant vel aliae forraturae vestire et portare vestitas publice seu patenter de cetero audeat seu presumat nisi itineratio aut alia urgens et imminens necessitas hoc exposeat. Contra hanc nostram ordinationem provisionem seu inhibitionem sive mandatum predictum quod absit, forsitan presumentes nostro decernimus cum presenti arbitrio puniendos. Huius autem decreti executionem usque ad proximum festum Penthecostes suspendimus et ex causa. Datum Gerundae die XIII aprilis anno a nativitate Domini MCCCC primo.

VI - Testamento Juan de Margarit