XL.
Pascalis II Papae litterae, quibus Stephanum Oscensem Episcopum arguit ob gravia in Barbastrensem ecclesiam admissa facinora. (Vid. pág. 127.)
Ex arch. eccl. Roten.
Paschalis Episcopus servus servorum Dei dilecto fratri S. Oscitano Episcopo salutem et Apostolicam benedictionem. Extulisti frater in coelum os tuum, cum Sedis Apostolicae statuta condemnans, Barbastrensem populum ne suo Episcopo justa persolveret, instruxisti. Haec profecto est episcopalis predicacio decimas prohibere, populum ab Episcopo evertere, Romana privilegia conculcare? Adhuc Barbastrensis Episcopi domum invadens, quae illic habebantur distraxisti, et ab ecclesiae villula praedam armata manu diebus sollempnibus abegisti-. Super his ab eodem Episcopo monitus quippiam reddere contempsisti. Insuper adversus eum Regis animum comovere temptasti. Excomunicatum ab eo militem in consorcium subcepisti. Praecipimus ergo in infra menses duos postquam praesentes litteras acceperis supra dicto Episcopo satisfacias, et in posterum ab hac omnino praesumpcione desistas. Alioquin nos te ab episcopali et sacerdotali officio, donec satisfacias, interdicimus.
